Psa 9 | TVK | STEP | Suv toto Deved iaxa tetisi O Iahova, namesuk del meulien tevi navan. Nihithiten holesok hos xil xa di opol ni.

Psalms 9

Memesien ba mi Hi xa di milepis rin na moletin xil del momalen

Suv toto Deved iaxa tetisi

1 O Iahova, namesuk del meulien tevi navan.
Nihithiten holesok hos xil xa di opol ni.
2 O Hi te xeihen, nikikei itel sien ve xouk,
e nipet rat hisom ni kikeien xil.

3 Melele xa ostal, ngan xil xa labae del nou lalesae.
E melele xa di lalesae ranuk, di lasavut, lamot e lamat.
4 Melele xa odotan e von xeihen nam
di olepis moletin xil nggusil reitinen e momalen nam.
E melele xa otelepis nou,
otekameti xa rin navan temal.

5 Xouk di osa pangasien mi moletin xil xa di lamot mi hi sav xil
e obas tan ni ngan xil xa lakavui.
Moletin xil linanem ti mun xil.
6 Ngan xil xa latevae tetel nou labop,
e obas vuol ni metimal nae xil.
Ma moletin xil iexil bovong ni xil vari.

7 E xouk, Iahova, obe Suv Toto vehakut.
Di odotan e von xeihen nam e di olepis moletin xil.
8 Io, di olepis kantri xil vus te ut etan nggusil momalen,
e di ole kuh rin na moletin xil del nenemien xa momal.

9 Iahova, xouk di odutou ni ngan xil xa mosav xil di lapurun xil,
e di osikoe xol xil e melengien te xeih xil.
10 O Iahova, ngan xil xa lakilak di laling nenesien nae e xouk,
vengan osakras ostokovein ngan xil xa lamei visaluk.

11 Mukikei itel memesien ihat mi xouk, Iahova, xa ode Vathu Saeon. ^{▼▼9:11 Saeon be vathu xa de sangas ni taon tahal Serusalem xa latekili ni Nim Eo na Hi teta en.}
E muhithiteni mi moletin xil vus e ut etan naha xa di opol ni.
12 Vengan xouk di olong tangen na ngan xil xa langgur longpangasien,
e di onem xat ngan xil xa lamat nggo he mosav xil.
Xouk iaxa usa rilomun ni naha xa di lapol ni,
mei ihe ae mun tang.
13 !O Iahova, iem isae e nou li!
Uketeh upus longpangasien navan
xa di nangguri nggo he ngan xil xa laketeh misa ni nou.
Xouk iaxa mei utal rat nou ra maten.
14 Imak, ma nikila nisoh pe met moletin xil tahal Serusalem,
e nihit usil holesok xil xa otepol ni e rin navan.
Io, itel memesien nihit usil suse xa oteteh meulien e nou.

15 Ngan xil xa latakil ti xouk di lamot labe vul xa xil tang latehili tengan mosav xil ti lamot lava en.
E siling xa latepol ni, di misen xat xil mun tang.
16 Io, xouk Iahova, otesa longpangasien mi xil
e naha xa latepol ni biles mei be ae mun tang.
Nggo rin ak, otesak ni xil mei lapus kil xouk sung.

17 Moletin xil xa lakavui ha lihe von maten,
vengan maten be hoxalite te ngan xil vus xa di lakavitou ni Hi.
18 Hoeo xil xa mosav xil di lanem male ni xil vehakut,
xouk, Iahova, iem nabong ni xil ti.
E ngan xil xa holesok nae xil tovuol xa latakil ti mun xa tutouen ixo xave vari,
xil mei liling nenesien nae e xouk.

19 !O Iahova, mea!
Onamaen moletin xil te ut etan ti linapol ni nenemien nae nali xouk.
Mei ulepis ngan xil vus te ut etan.
20 O Iahova, upol ni xil ulixil ikan ni xouk.
E usak ni xil lipus kila xa labe moletin xil te ut etan tang,
e linati ti navehi.